Prinses en Prinsepare 2019 van de Reube

Prinses Esther

Prinses Esther (3x11 jaor awt) is ein èch Reubinneke. In ’t dageliks laeve sjteit ós Prinses veur de klas op basissjoal de Bolleberg in Maria-Hoop. Daonaeve is zie lid van sjötterie St. Willibrordus woo zie de dwarsfluit besjpeelt. Aug is Prinses Esther ein fanatiek lid van de vastelaovesgroep “wie auwer-wie gekker”.

Bie ózze kersverse Prinses sjtruimp ’t richtige vastelaovesblood door ’t lief, höör mooder Tillie ontving namelik ein paar jaor geleeje ’t vastelaoveshart van de gemeinte Zittert-Gelaen-Bor ès dank veur höör insjpanninge veur de vastelaovend in ’t Reuberiek.

2019 Prinses Esther I

Senioreprinsepaar Mart I & Ria

Senioreprins Mart I is gebaore in Stein en opgegreujd in Aelse. Senioreprinses Ria is gebaore in Haerle en haet vervolges 21 jaor in Baek gewoond. Naodat zie zich laerde kènne woonde zie ein paar jaor in Geverik, mèr sinds 1979 in ’t Reuberiek. Senioreprins Mart I is in zien dageliks laeve veural bezig mit klusse, ’t aafrichte van jachhunj, jachhoorn blaoze en jage. Senioreprinses Ria deit ’t daorentaege ein bietje “röstiger” aan mit puzzele, laeze en ès vriewilliger bie de Zonnebloem. Same höbbe zie twea dochters en twea kleindochters, wovan ‘t oudste lid is van ós Dansmariekes!

2019 Mart I en Ria

Jeugprinsepaar Mauro I & Lynn

Jeugprins Mauro is 11 jaor awt en woont al zien ganse laeve in ’t Reuberiek. Mauro is lid van sjötterie St. Willibrordus woo hae veurop geit mit ’t bördje; daonaeve sjpeelt hae aug nog pijperfluit. Mauro is auch sjportief; hae is namelik lid van VV Obbeeg, woo hae de aanvalslinie van JO13-1 aanveurt. Mauro is eine echte vastelaovesvierder dae vanaaf zien gebaorte al betrokke is bie de vastelaovend in ’t Reuberiek; hae treujd op ès arties op de jeugmiddig of löp mit in de optoch, hae is d’r altied bie!

Jeugprinses Lynn is auch 11 jaor awt en zit sjus wie Jeugprins Mauro in groep 7/8 van BS De Kingbaek. Bie Lynn geit de meziek wie eine roaje draod door höör laeve; zie is namelik lid van Concordia Obbeeg. Bie Concordia wirk Lynn hèl aan heur carriejaere ès sjlaagwirker. Daonaeve turnt Lynn en dans zie de sjtèrre van de hemel bie ós Dansmariekes. Vastelaovend viere zit bie Lynn in de femilie, höör zus Fenne waor namelik al aerder Jeugprinses bie de Reube. Same mit Jeugprins Mauro I is Lynn dit jaor ’t boegbeeld veur de Obbeegse Jeug en zulle zie veurop gaon in de polonaises!

2019 Mauro I & Lynn